Aus unserer Serie "News-Scouts - SchülerInnen berichten aus der Lerngruppe „Freie Adler“ (5.-7. Klasse)":
Am Zystig hei mir d'Vorbereitige für üsi zwöitägegi Expedition troffe. Mir hei üs überleit, was mir für die zwöi Täg alles bruche u ar Wandtafele e Packlischte grschriebe. Mir hei nid meh dörfe mitnäh, als das, wo da druffe gstande isch. Alles Ässe hei mer gmeinsam planet. Das isch gar nid so eifach gsi. Mir hei i üsere Lerngruppe Allesässer, Vegetarier u Veganer. Aber mir hei gmerkt, dass es doch nid so kompliziert isch uf alli Rücksicht z näh, so dass alli zfride si derby.
Als nächschts hei mir es paar Grupperegle für underwägs ufgschriebe.
U jetz he mier müesse lehre, wie me uf ere 25'000er Charte Koordiante cha abläse. Mir hei nämlech de so üse Wäg müesse finde. Am Afang isch das rächt schwär gsi, aber mit der Zyt isch es gange.
Mit üsne Packlischte si mir de heizue u am Abe im Bett hei sech viel uf e Donnstig gfreut. Einzelni hei sicher o chli es mulmigs Gfühel gha. Mir hei schliesslich nume gwüsst, dass mir ds Frutige starte u nach zwe Tag wider ds Frutige achöme – u süsch gar nüt.
Am Donnstigmorge hei mir üs bi schönschtem Wätter am Achti am Bahnhof ds Frutige troffe. Nachhär sy mier gah ychoufe. Jedi Gruppe isch mit em ne Wägeli uf d Suechi nach de Ässware. We mir se hei gfunde, hei mer se yscannet. Mir hei 130 Fr. Budget gha u so hei mir geng chönne luege, öb ds Gäld no längt. Mir hei zum Byspiel diskutiert, öb mer gschyder zwöi einzelni Kilo oder 4 Pfünderli Brot sölle choufe. Mir hei üs de für 2 grossi Brot entschiede. Jupi, ds Gäld het glängt! Mit hei also sehr guet planet gha.
Mit em volle Ychoufswägeli si mer jetz vor üsne Ruckseck gstande, wo zum Teil scho ziemlech gstopft sy gsi. Mir hei glychmässegi Hüüfeli gmacht u ds Ässe so ungerenand ufteilt u de ypackt. U de si mer ds erschte Mal mit üsne schwäre Ruckseck gloffe, zrugg zum Bahnhof.
Bym Bahnhof hei mir die erschte Koordinate übercho. Die Koordinate hei üs mit em Bus zum Margeli ds Adelbode gfüehrt. Wo mer de us em Bus si usgstige, het es Chind e nasse Rucksack gha, wüll d Fläsche usgloffe isch, u es anders Chind het gmerkt, dass es syni Fläsche deheime vergässe het.
Mir hei üs uf e Wäg gmacht u scho nach churzer Zyt es falsches Wägli verwütscht. Uf em richtige Pfad isch es jetz so richtig los gange, e steile, steinige Wäg. Öppe am Elfi, nachdäm mer fasch zwe Frösche vertramplet u üs nomal verloffe hei, heimer e Znünipouse gmacht. Für jedes hets e Öpfu u e Riegel gäh. Die einte hei im Bachbett gässe, die andere uf dr Brügg. Bym Wyterloufe isch es üs nid längwylig worde, will mir spannendi Diskussione gfüehrt hei.
Immer we mir e Koordinatepunkt erreicht hei, hei mer e chlyni Pouse chönne mache, will die nächsti Gruppe uf der Charte zersch wieder het müesse dr Wäg sueche. Zum Zmittag hei mir Brot, Landjäger – o vegani – Chäs u Gurke gässe. Es isch wunderbar gsi. Nach em Ässe hei mer no im Bach gspielt u äs Steimanndli boue.
U de isch üse Wäg wytergange gäge d Bunderfäll. Uff, das isch gloub die hertischti halb Stund vor ganze Tour gsi: D Sunne het sänkrächt vom Himmel abebrönnt u es isch über ne sandige, steinige Wäg eifach nume steil obsi gange. Dr Schweiss isch üs nume so abegloffe u mir si dankbar für nes Trubezucker gsi. Üsi Trinkfläsche hei sech o langsam gläärt u mir si sehr froh gsi, hei zwöi Chind e Filter derby gha, so dass mir us däm yschalte Bunderbach wieder hei chönne Wasser uffülle!
Jetz isch es chli gradus gange, aber leider nid für lang! Mir hei neuji Koordinate übercho u es isch uf ere churze Strecki grad 80 Höhemeter obsi gange. Obschon mer üs no mit em ne Twix gstärcht hei, het eis vo üs de grad chli Müeh gah u zwe Jungs hei Sherpa gspielt u däm sy Rucksack treit.
Bym ne nächschte Koordinatepunkt hei mer üs mit ere Banane doppt, dass mer no hei möge. Ds Guete isch o gsi, dass üsi Ruckseck geng chli si liechter worde, we mir öppis hei gässe. Es isch jetz nümme so stotzig gange, derfür are Teerstrass nache bis zum Bunderstübli uf der Bunderalp ungerem Bunderspitz. Drü Chind hei jetz dr Uftrag übercho, ahand vom ne Ahaltspunkt wo sie de sötte entdecke, üses Ziel z finde. Die andere vor Gruppe hei e grössere Abstand yghalte. Die drü hei als Ahaltspunkt Anna Katharinas Outo gfunde u somit üses Ziel – ds Bärghuus Bunderalp.
Alli si froh u glücklech gsi, dass mir am halbi Füfi nach öppe 600 Höhemeter ändlech si acho u hei chönne üsi Ruckseck abzieh.
Mir si scho chli müed u erschöpft gsi. Aber mir si de grad mit em ne Glacecornet verwöhnt worde u hei derzue d Abesunne u ds Bärgpanorma gnosse u de Wulche nache gluegt. U de isch es scho wider losgange. Jede het wieder Energie i de Adere gha. Öpper het Würfel gholt, wo är het mitgno u de hei mer afe spiele was das Zeug hält. Mir hei «rasende Paula» gspielt. Sie isch würklech graset!
Anderi hei scho wider Chraft gha zum Redli z schlah!
Üsi Lernbegleiterinne hei üs nächär üsi Lager zeigt u de isch es a ds Choche gange. Mir hei Gaschocherli u Gaskartusche mitgnoh, u dass die grosse Wasserpfanne uf dene Chocherli hei ds Glychgwicht bhalte, isch gar nid so eifach gsi. Aber mir heis zum Glück gschafft! Es het Hörnli mit rotem u grüenem Pesto gäh u derzue Rüebli, Gurke u Peperoni.
Nach em Ässe hei mer no müesse abwäsche. Üsi Sache si sehr fettig gsi u mit chaltem Wasser geits nid so guet! U de hei mer no Blackstories spielt u es Klassefoti gmacht.
U de wär da no d Gschicht vom Geisse-Bueb! Öppe 12 Geisse si wahnsinnig gwunderig gsi u hei hinger üsi Sache wölle. Eine vo üsne Jungs het sech de zum Ziel gsetzt, die Tier wieder heizbringe – was leider nid so eifach isch gsi aber für üs alli sehr luschtig. Es paar anderi Chind si ihm de ga hälfe u so hei sie s`gschafft, die Gwundernasene z überlischte.
Später hei es paar Chind Luscht ufene Abespaziergang gha, also eher e Abelouf. Füf Jungs hei sech uf e Wäg gmacht, 300m obsi zur Schatthütte. Alli andere Chind hei vo unde zuegluegt u d Lernbegleiterinne mit de Fäldstächer. Sie si froh gsi, dass nach 40 Minute alli wieder gsund si zrugg cho.
Gli hets de afe ydunkle. Es isch würklech stockdunkel worde, also würklech soooo fescht dunkel! Mir hei üs vor em Hus i ne Kreis gsetzt u d Brigitta het üs es Cherzli gäh zum Azünde. U de hei mer enand vo däm schöne Tag u de erläbte Erfahrige verzellt. Viel hei gseit, dass er astängend isch gsi u einzelni hei die eigeti Komfortzone chli müesse verlah. Als Bettmümpfeli hei mer es Chuehli-Guetzli übercho.
Mit de Stirnlampe hei mer de dr Wäg zu üsne Schlafseck gsuecht,aber nei, gschlafe hei mer no nid! Mir hei üs no Witze verzellt oder Blackstories gspielt. Irgend einisch isch de d Brigitta cho säge, mir sölle doch jetz pfuuse, was mer de o gmacht hei.
Am nächste Morge si mer mit neuer Energie erwachet. Die einte Chind si scho yfrig am Vorbereite vom Zmorge gsi. O hie isch ds Glychgwicht uf em Gasbrönner wider es Thema gsi. Ds feine Porridge uf em Teer wär doch de schad gsi u mir hei üs ja wieder müesse sterche. Als Überraschig hets no es früsches Gipfeli gäh!
U de hets gheisse Abwäsche u d Ruckseck packe. Bevor mer si losgloffe, hei mir ir Hütte no dörfe ds Chäs-Chessi u dr Chäs-Chäller luege. De hei mer üs verabschiedet u u dr wyter Wäg under d Füess gnoh.
Es isch öppe halbi 10i gsi, wo mir gäge d`Elsigealp si losgloffe. Mir hei immer no Koordinatepünkt übercho für der nächst Ahaltspunkt usezfinde. Mir hei o gmerk, we me würd uf d Wägwyser luege oder me d Charte dr richtig Wäg het, dass me schneller a ds Ziel chiemti. Zwüschedüre hets geng wider es Trinkpöiseli gäh. Dr Wättebricht het leider Gwitter akündet u so hei mir üsi Tour müesse abändere. Uf dr Metsch hei mir üs als Gruppe müesse entscheide, öb mir diräkt i Elsigbach wei loufe oder nomal 100 Höhemeter obsi kraxle zum Brandseeli u derfür de mit dr Bahn vor Elsigenalp abe. Mir hei de abgstumme u entschiede, dass mir die Höhemeter zum Brandseeli no möge loufe. Mir hei se de fasch i Rekordzyt gmeisteret!
Bym Brandseeli si mer de grad chli enttüscht worde – es isch es Badeverbot dert ghanget. Nach em ne Telefon zur Bahn isch de aber klar gsi, dass mer doch i ds Wasser dörfe, was vieli gfreut het!
Zersch hei mer no e Challenge übercho. Ds Ziel isch gsi, dass alli uf dr Slackline stöh für nes Klassefoto. Das isch aber sehr schwierig gsi. We öpper ds Glichgwicht het velore u isch abegheit, hets e Dominoeffekt gäh u mir hei wieder vo vore müesse afah. Mir heis knapp gschafft für nes Foto, doch es isch leider nid so scharf cho!
Die einte hei jetz müglechscht schnäll i früsch See wölle, die andere hei ds Zmittag vorbereitet. Einzelni si sogar düre ganz See gschwumme aber brrr, es isch scho chli chalt gsi!
U de hets es grosses Buffet gäh vo allem, wo mir vo dene zwe Täg no hei übrig gha.
De hei mer es letschts Mal zämepackt u si Richtig Bahnstation gloffe. D`Bei si afe chli schwär gsi u mit dr Bahn dörfe abefahre, isch jetz doch agnähm gsi. Im Elsigbach si üs es paar Müettere cho abhole u hei üs nach Frutige a Bahnhof bracht.
Mir si müed, glücklech u o chli stolz über üsi Leischtig gsi u hei als Lerngruppe zäme sehr viel erläbt, wo mir nid grad wider wärde vergässe!
